Canada iyo Ireland waa Saaxiibbadeen

Wasiirka Socdaalka ee Canada, Axmed Xuseen, ayaa caawa ka wadahadalnay xiriirka labada dal ee Soomaaliya iyo Canada.

Wasiirka oo telefoon igula soo xiriiray, waxaan uga mahadceliyay taageerada Canada ay la garab taagan tahay DOwladda iyo shacabka Soomaaliyeed, gaar ahaan waxaan uga mahadceliyay deeq lacageed oo hor leh oo ay Canada ugu deeqday Laamo ka tirsan Qarammada Midoobay oo howlo samafal iyo horumarineed ka wada Soomaaliya.

Waxaan Wasiirka si gooni ah uga mahadceliyay booqashadiisii dhoweyd ee xeryaha Qaxootiga Dhadhaab.  Maaddaama uu Wasiirku qaxootinnimo soo maray wuxuu tusaale fiican oo ay ku daydaan uu u noqon karaa dhallinyarada xeryaha ku jiraa in haddii ay aqoon iyo dadaal ay isku darsadaan ay wax weyn qabsan karaan.

Waxaa kale oo aan Wasiirka soo qaadnay sidii ay Soomaaliya ay Safaarad ugu yeelan lahayd Ottawa, caasimadda dalka Canada.

Dhankiisa wuxuu Wasiirku qiray in Canada ay aragto tallaabooyin muhiim ah oo billow ah oo ay qaadday Dowladda cusub ee Soomaaliya.

Jamhuriyadda Ireland

Isla toddobaadkan waxaan telefoonka ku wadahadalnay Ra’iisal Wasaare ku Xigeenka Ahna Wasiirka Arrimaha Dibadda iyo Ganacsiga ee Jamhuriyadda Ireland, Simon Coveney.  

Ra'iisal Wasaare ku xigeenka waxaan ka wadahadalnay iskaashiga labada Dowladood ee Soomaaliya iyo Ireland ee dhinacyo dhowr ah oo ay ka mid tahay diblomaasiyaddu.

Wadahadalkani Wasiirka Ireland aan la yeeshay wuxuu ahaa midkii labaad, laba bilood gudahood.

Canada iyo Ireland waxay ka mid yahay dalalka marti geliyay qaxooti Soomaali ah.