Total Pageviews

Sunday, 16 June 2013

Eedeyni xal ma keento


Xalku eedeyn kuma yimaado
Inqaasta Yusuf-Garaad 


Waxaa sii badanaya eedeymaha loo jeedinayo siyaasiyiin dhowr ah oo Soomaaliya madax ka soo noqday. Waxaa lagu eedeynayaa in ay hadda u dhaqmayaan si qabiileysan. Eedeymahaas oo saxaafadda bulshada lagu soo bandhigay waxay inta badan ka imaanayaan Muqdisho ama dad ka soo jeeda.

Dadka la eedeynayo waxaa ka mid ah, Cumar Cabdirashiid iyo Cabdiweli Gaas oo labaduba Raiisal Wassare ka soo noqday Soomaaliya iyo Maxamed Cabdi Gandi oo ahaan jiray Wasiirka Difaaca, haddana ah mudane ka tirsan baarlamaanka. Waxaan filayaa in aad garatay in eedeyntaasi ay tahay mid la xiriirta waxa ay siyaasiyiintaasi ka yiraahdeen am ay ka qabteen khilaafka hadda u dhexeeya Dowladda iyo Shirkii Kismaayo lagu soo gebagebeeyay bishii May.

Isla dadka eedeymahan jeedinayaa waxay hore ugu daaleen eedeynta iyo cambaareynta Axmed Maxamed Islaan oo shirkii Kismaayo ka socday uu u doortay Madaxweynaha Jubbaland oo laga wado Jubbada Hoose, Jubbada Dhexe iyo Gedo. Mas’uulka kale waa Madaxweynaha Puntland oo looga soo horjeedo taageerada uu la garab istaagay Jubbaland.

Anigu sadarradan kuma qiimeynayo sax iyo khalad waxa ay sameeyeen mas’uuliyintaasi. Laakiin waxaa ila habboon in inta eedeyneysaa ay aqbalaan in waxa la isku hayaa ay yihiin fikir iyo dano siyaasadeed. Si xal looga gaarana ay marka hore tahay in la is aqbalo qof walbana lagu tixgeliyo mowqifkiisa, iyada oo aan beel dadka lagu riixin. Midda kale oo aqbalaadda u baahan waxay tahay in ninka siyaasiga ahi uu fikir iyo dano labada leeyahay, una madax bannaan yahay in uu ku dhaqaaqo wixii aan xad gudub ku ahayn sharciga dalka iyo kan caalamiga ah.

Haddii ay noqoto in beel lagu riixo, waxay markaas ahaaneysaa inta iyaga beelnimada ku eedeyneysa laftoodu in ay ka soo jeedaan beel kale. Markaasna waxaa la noqoneyaa beelo is haya.

Qormadeydu kuma saabsana in aan qof ama ka badan ama xataa qabiil aan daafaco. Waxaan uga dan leeyahay in la dhimo eedeynta dadka kala fogeynaysa. Waxaa habboon in laga hadlo waxa la isku hayo iyo sida xal looga gaari karo. Cidda ay mas’uuliyadda xal raadintu ay saran tahayna, gacan lagu siiyo hawshaas culus muhiimkana u ah Soomaali oo dhan.