Total Pageviews

Tuesday, 2 July 2013

Dhaawaca Kismaayo


 Dhaawaca Kismaayo Xagguu miciin biday?
Inqaasta Yusuf-Garaad

Dagaalkii dhowaan ka dhacay Kismaayo looga saaray Barre Hiraale iyo kooxo kale oo ay is hayeen Shiikh Axmed Maxamed Islaan, ayaa waxaa ku dhintay dad fara badan boqol kuwo kor u dhaafayna wey ku dhaawacmeen.

Waxaan maqlay in shalay Muqdisho la geeyey in ka badan 70 dhaawac ah oo dhinaca laga taag roonaaday ah.

Warka hadda i soo gaarayana wuxuu sheegayaa in maanta ay billaabatay in dhaawicii dhinaca Axmed Islaan loo daad gureeyo Puntland.

Waxaan is iri warkaasi ma aha mid lagu farxo, waana dhiilla colaadeed iyo kala aammin bax hor leh.

Waxaan ka warsugnay booqashooyinkii wufuudo dhowr ah oo Dowladda ka socdaa ay ku tageen Kismaayo. Waxaan ka warsugnay wafdigii xaqiiqa raadiska ahaa ee IGAD. Waxaan ka warsugnay shir madaxeedkii IGAD. Waxaan ka warsugnay Shirkii Madaxweynayaasha Soomaaliya iyo Kenya.

Waxaan ka warsugnay Shirkii Addis Ababa ee Faarax Cabdulqaadir oo matalayay dowladda Federaalka iyo Axmed Maxamed Islaan.

Intuba waa dadaal, laakiin midna kuma guuleysan in uu baajiyo in la is dilo.

Maalin kasta oo xal la’aan la joogo waxay sii adkeyn doontaa xalka, khatartuna wey sii badin doontaa.

Waxaan dowladda iyo waxgaradka Soomaaliyeed ugu baaqayaa in arrintan culeyska ay leedahay la dareemo, khatarta ka imaan kartana la dhicisyo.

Siyaasaddii shaqeyn weyday iyadana waa in wax laga beddelo oo dadka la kala badbaadiyo.

Adigu maxaad is leedahay?