Total Pageviews

Wednesday, 17 July 2013

Shiikh Xasan Daahir waa kuma?


Shiikh Xasan Daahir: Wadaad Waranle ah
Inqaasta Yusuf-Garaad

Waxaa uu ku xiran yahay Xarunta Dhexe Nabad Sugidda ee Muqdisho. Ma ahan markii ugu horreysay ee uu xabsi galo. Hadda ka hor Dowladdii Maxamed Siyaad Barre ayaa xabsiga dhigtay. Maxkamadda Badbaadada ayaa isaga iyo rag kale waxay ku xukuntay dil toogasho ah. Madaxweyne Maxamed Siyaad ayaa markii dambe cafiyay.

Xasan Daahir Aweys, sannadkii 1935 ayuu u dhashay Macallin Dugsi Quraan. Reer Galguduud waxay ii sheegeen, Macallin Daahir dugsiyadiisii Galguduud in ay ku Qura’aan barteen oo ay ka aflaxeen arday fara badan oo markii dambe qaarkood ay dalka xilal kala duwan ka qabteen.

Shakhsi ahaan waxaa lagu tilmaamaa nin aan isla weyni qabin, lacag sameyn, una nool sida bulshada dan yarta ah.

Hadda waa nin oday ah oo dalka Soomaaliya si weyn looga yaqaan. Taariikhdiisa oo aad u dheer waa mid aan is qabaneyn oo isugu jirta waddaniyad aad u sarreysa iyo khilaaf iyo dagaal dhiig badani ku daatay.

Waa nin aan naftiisa dagaal uga turin. Isaga oo sarkaal ah ayuu Billad Geesi ku qaatay dagaalkii Soomaaliya iyo Ethiopia 1977.

Intii ay burburtay Dowladdii Dhexe ee Soomaaliya 1991, isaga oo marba magac huwan wuxuu ka qeyb galay si toos ah, si abaabul ah ama si taageera ah dagaal kasta oo magaca diinta wax lagu weeraray ama la isku difaacay. Ka soo billowo dagaalkii al Itixaad ee Araare 1991, kii Itixaad ee Gobolladii berigaas loo yiqiin Woqooyi Bari oo hadda ah Puntland 1992, mar kale Itixaad Gobolka Gedo bartamihii 1990-aadkii, dagaalkii Maxkamadaha ee 2006, kii Muqaawamada ee daba socday, kii Xisbul Islaam iyo kan hadda ee Shabaab.

Inkasta oo Xasan Daahir dadka yaqaannaa ay ku tilmaamaan nin sheekoole ah, furfuran, qosol badan, caddaaladda jecel haddana marka aad taariikhdiisa deristo waxaa lagu tilmaami karaa nin aan naftiisa u rooneyn oo Naftii-hallig ah.

Wuxuu ku dhaawacmay dagaalkii 1977. Waxaa lagu xukumay dil toogasho ah. Wuxuu ku dhaawacmay dagaalkii Gedo. Wuxuu ka badbaaday saddex jeer oo la isku dayay in la dilo - Balli Doogle oo gaarigiisu soo istaagay meel isbaaro ah ayaa baas lagu furay laguna dhaawacay, Isbitaalka Wanla Weyn ayaa lagu weeraray isagoo dhaawac ah, Muqdisho isaga oo Salaad subax u soo kallahay oo Masjidka u socda ayaa jidka loo galay oo rasaas lagu furay laguna dhaawacay.

Xasan wuxuu ka tirsanaa Maxkamadaha Shareecada oo uu Guddoomiye u ahaa Shiikh Shariif Shiikh Axmed oo markii dambe loo doortay madaxweyne. Xubno badan oo ka tirsanaa maxkamadaha iyo Isbahasigii dib u xoreynta, inkasta oo dowladdii Madaxweyne Cabdullaahi Yusuf iyo Ra’iisal Wasaare Cali Geeddi ay ku eedeyn jireen argagixisnimo, haddana ma jiro mid la soo taagay Maxkamad.

Taa cagsigeed waxaa ka soo baxay Madax badan oo noqday, Wasiirro, Guddoomiye Baarlamaan, Madaxweyne Maamul Goboleed, Taliyayaal ciidan, Safiirro iyo Generaallo, kuwaas oo qaar badan oo ka mid ah uu Xasan Daahir madax u ahaa berigii ay ka tirsanaayeen maxkamadaha.

Waxa keliya ee ay ku kala duwan yihiin Xasan Daahir iyo madaxdaas dowladdii hore iyo tan hadda ahba ka tirsan, waa laba arrimood. Iyagu waxay aqbaleen in ay dowladdii markaa jirtay iyo baarlamaankii ay wax la wadaagaan islana shaqeystaan. Midda labaad iyagu al Shabaab kama tirsnayn.

Xasan kuma biirin al Shabaab ee dagaal la wada ogaa oo Xisbigiisii looga adkaaday ayay ku qabteen kuna khasbeen in uu iyaga ku biiro. Intaa wixii ka dambeyay ma cadda Xasan Daahir kaalinta uu ku lahaa Shabaab.

Ma ka mid ahaa ragga tashkiiliya dhallinyarada yar yar ee naftoodii halligay markii ay is qarxiyeen, isla markaana galaaftay nafta shacab badan? Nimkaas dhallinyarada tashkiilinaya oo la ogyahay qaarkood in carruurtoodu ay dhul nabad ah oo dalka gudihiisa iyo dibaddiisaba leh ay ku dhaqan yihiin waxna ugu bartaan.

Inkasta oo muddo dheer la hadal hayay in uu Shabaab ka soo goosan doono, hadda uma eka in uu rabitaankiisa uga soo baxay. Waxay u muuqataa in meeshaa raggii kale ee Madaxda Shabaab ahaa qaar la dilay, qaar xabsiga la dhigay, qaarna baxsad yihiin, in ay isaga u suurta gashay in uu ka baxsado Shabaab.

Xasan Daahir wuxuu ka baxsaday magaalada Baraawe isaga oo doon saaran oo ay la socdaan dhowr wiil oo hubeysan. Meel aan ka fogeyn magaalada Muqdisho, waa xeebta Jeziira ayay doontii fariisatay. Ma cadda in shidaalku ka go’ay iyo in cillad kale ay heshay.

Su’aasha jawaabteeda looga baahan yahay Madaxda Dowladdu waxay tahay waayo cidda u gurmatay ee u suurta gelisay in uu safarkiisa sii wato ilaa Hobyo? Maxaa markaa loo qaban waayay?

Su’aal kale waxay tahay, maxay ku wada hadleen Odayadii qabiilka Xasan markii ay la kulmeen Madaxweynaha ka hor intii aanay aadin Cadaado? Yaa kharashkeeda bixiyay dayaaradda khaaska ah ee ay kiriysteen ee dhowr maalmood u fadhiday Cadaado?

Markay Xamar keeneen, maxaa sababay in odayaal aan hubeysneyn la garaaco? Xataa haddii ay isku dayeen in ay is hor taagaan in la xiro Shiikha. Sow farahooda lagama bixin karin iyada oo aan dhaawac la geysan?

Markii Madaxweynuhu la kulmay odayaashii la garaacay, ma jiraa in madaxweynuhu ballan qaad sameeyay?

Ugu dambeyntii maxaa keenay in mas’uuliyiinta dowladda uu midb mar ka hadlo “arrinta Xasan Daahir”, iyada oo aan haddana wax tallaabo ah oo dharciga waafaqsan aan lagu dhaqaaqin?

Su’aalahan aan jawaabahooda la hayn iyo go’aan la’aantu waxay abuurayaan xiisad. Dadka qaar dano kale leh ayaa ka faa’iideysan kara. Waxaa is biirsanaya dad waxyaabo kala duwan u careysan.

Dowladda waxaa looga fadhiyaa in ay go’aan cad ka qaadato waxa Xasan Daahir ay ka yeeleyso, isla markaana ay la socodsiiso bulshada.

Inta go’aanka dowladdu maqan yahay, waxaa looga tala gelayaa in aan dowladdu aqoon waxa ay ka yeeleyso Shiikha gacanteeda ku soo dhacay. Mar kasta oo go’aanku sii daahana waxaa sii kordhaya hadal haynta iyo culeyska arrintu ay leedahay. Waxaa sii kordhi doona cadaadiska iyo ku mashquulinta Xasan Daahir.

Ma ahan dowladdu wixii libin u ahaan lahaa in ay iyadu lug gooyo ka dhigato. Xasan Daahir Aweys waa nin magac weyn, meel weyna uga jira Islaamiyiinta Soomaaliya, gaar ahaan kuwooda cududda maala. Dowlado badan ayuu la soo diriray, wanaagna wuu ka qeyb qaatay oo Muqdisho oo shan meelood oo kala duwan ay dayaaraduhu ka soo degaan isaga iyo Maxkamadihii uu Madaxdooda ka mid ahaa ayaa suurta geliyay in gegida dayaaradaha ee Muqdisho dib loo furo. Taas oo ah midda isaga hadda laga soo dejiyay.

Ninka noocaas ah oo gacanta u soo galay iyada oo aan dadaal badan u gelin, Dowladda waa in uu u noqdaa guul iyada u soo hoyatay.

Hadda waxaa Xasan daahir u doodaya odayaal qabiil oo leh Madaxda Dowladda ayaa nagu ballan furtay. Hadday xaaladdu sidan sii ahaato, waxaad mar dhow arki doontaan Hey’adaha Xuquuqda Aadanaha oo sheegi doona in uu Maxkamad la’aan xiran yahay.

Laba mid ayuu xalku ku imaan karaa. In la sii daayo (masaafuris iyo haddii kaleba) iyo in Maxkamad la soo taago qareenna loo oggolaado. Labada tallaabo middii ay dowladdu ku dhaqaaqeyso waxaa la gudboon in ay si dhakhsa ah ugu tallaabsato.
Posted by at

44 comments:

  1. shakata17 July 2013 at 15:57

    Mudane yuusuf warkaas aniga ma fahmin, taariikhdaas waxaad ka reebtey waxyaabo badan aadan kuma soo darin in qabiilka hadda u ololeynaaya uu u geystey dhibaato horeyna uga diidey talo iyo baryo, talo diidkaasna uu martey kumanyaal shacab ah, aqoonyahanno, hanti iyo in ilaa hadda laga la'yahay inuu ka tanaaasuley shidadii uu ku jirey.

    teeda kale yuusuf maxaa ka jira inaad ka qoomameysay kulankii haben dhaweed sida waaga cusub ku soo qorey ninka leh.

    please take care, you are our hero!!!

    ReplyDelete
  2. Mahad gedi17 July 2013 at 16:02

    Yusuf mahadsanid , waxay ila tahay arinta xasan dahir in dowladu aysan wado fiican u Marin waxa ka muqata ineysan u diyar saneyn arimahan oo kale AMA goan ka qadashada madaxda dhababka. Xasan daahir waxu dowlada ku yahay imtixaan ay mareyso dhanka kalena waa waxu u yahay guul waxaa fiirsanaya dad bandan oo mucaarid iyo muxaafid leh. Xukunka uu manta qaatana waxuu sameynaya nin kasto shabaab ah oo isi soo dhiiba qasahan kuwa xasan la dabiga ah ee aan ahayn juwa caalamku doonayo waa hadii cadaalada la marayo . Marka dowladu si Yusuf shegay wa iney labo wado mid qaado cafis AMA maxkamadeyn oo aan lala daahin mahaan iney hada ku kor fikirto nin uxiran waxay ahayd iney horey uga fikirto arima nocan ah. Dhanka kalena waxayba ahayd qalad in odey dhaqamed loo Diro xasan dahir ee waxay ahayd in dowladu sarakiil udirto AMA laga xaajodo maamul kii hayay .

    ReplyDelete
  3. Unknown17 July 2013 at 16:08

    yusuf afkada cano lugu qabay
    1)sheikh xasan al shabaab ma ahan.
    2)sheikh waa dul man yahay 100%100
    3)wuxuu mudanyahay wanaag in loo sameyo mada uu furan garoonkii 22 sano xirnaa

    ReplyDelete
  4. Unknown17 July 2013 at 16:31

    mahadsanid yusuf. Wax badan ayaa ka iftimisay tarikhdisa inkasto la orankaro haddana lama soo koobi karo taarikhdisa shiekh hassan . waayo waa nin dagaalamayey tarikh ad u dher,Dowlada Somalia waxa looga fadhiyaa inay u cadayso dadka Somaliyed ; in Xassan Dahir ay Dowladu iyadu mawqif ka qaadanayso iyo In quwado caalami ah ay haystaan .Malahayga taa dame ayaan dadbadan aamin sanyihin sababtoo ah qofku denbikasta halahaado,sababkasta haloo soo xiro waa inuu helaa garsoor iyo maxkamad cadaalada marisa !

    ReplyDelete
    Replies
    1. Unknown18 July 2013 at 02:55

      Mohamud sxb Waxa ay ila tahay somalidu maalin kasta waxa aysan gurigeeda kula yaabin ayay dadka kale kula yaabtaa.. dhamaan dadka ku dhaliilsan yusuf taariikhdan ama xasan daahir jecel in sidii dambiile loo toogto tolkiisna eedda u haya

      1- Yusuf Taariikh uunbuu ka hadlay eedda uu ka qoray ayaana ka badan amaanta
      2- Dowladdu xoogeeda kuma qabsan xasan dahir Haday dagaal ku dilaana waa loo ducayn lahaa sheikhana wuxuu ilaah horgaysta alla ha u barakeeyo xumaan iyo wanaagba ayaa la dhihi lahaa lakiin nin tolkiis dhaxjooga dadbadan oo difaacana (alla wax qaldan lama waaye) in uu heli ay suura gal ahayd oo halkaas dhiig kale ku daadin lahaa yay dowladu tiri odayaal na caawiye aanu ninkaas helnee ee noo keena, marka caddaalada lagaam tagee hadii taasu jirto odayaashu ma wanaag bay sameeyeen mise xumaan? hadii looga baxayse maxaad u caynaysaan allaa odagu wuu ku adkaystay in uusan soo raacin balan bayna ka qaadeene. (mise hadii aysan qabiilkaada ahayn in odayaal lagu been furo oo qabiil dhan madaxdiis la jirdilo yaa wanaag idinla ah) waxaa laga yaabi lahaa in qabiilada qaar dagaaloogayaashooda hadii saas loo dhaqmo uu dagaal dhici lahaa
      3- intaas kadib hadii xasan daahir beeshiisa badi ay ogolyihiin in la maxkamadeeyo ama si sahlan loo xaliyo arintiisa maxaa jiitanka keenay ?
      4- Dadka aadka ula yaaban beesha xasan dahir waxaan waydiin lahaa waxa u dhexeeya axmed madoobe iyo xasan? axmed madoobe xisbul islaam ayuu ku jiray maxkamadihii iyo dagaaladii itobiyana waa galay,shabaab ayay iskula dhecen kismaayo kenya ayauuna u galay oo dadkiisina waa sheeikh karaamaysan bay leeyhiin somalidii kale badina waa daba dhilif. xasan ayaan itobiyan iyo ugandese marnaba ma rabo taagan oo hal mowqif qaba ee sheihk axmed madoobe shalayna diin buu u nacayay gaalada oo dad ugu laayay maantana gaalo kale ayuu la socdaa.
      5 waxa jirta in ragg TV ga ka hor qirtay qaybta dad qalida ayaan u joogay shaab leh la daayay kuwa badanna dowladda xubno ka yihiin waxa kale ee jirta in abuu mansuur oo alshaab raggii ugu magaca dheraa ahaa tolkiis la joogo cidina kama hadleesee hadii tolka xasan dahir kuwa aan si fiican u fekerin oo shaluu idin talo diiday oo idn laayay xasan aan islahayn ay taageersanyihiin adeeroow maxa ka duwanyihiin somalida kale.
      6 haday xal tahay in la daayo xasan madama laga yabo inuu wanaag hore iyo tagero hadaa leeyahay tolkiis leeyihiin waa naloo balan qaaday, dowladu sheegtay dadka waa la cafinaa maxaa ku jaban oo dadku waa danbiile ee hala maxkamadeeyo ugu waasheen dagaal ooge iyo danbiile waa buuxaane maxaa maxaa loo maxkamayn waayay Allah intaad ka yaabto ( Cabdi qaybdiid, Qanyare , muuse suudi, salaada cali jeelle iyo kuwa kale soow maanta madax maahan meeqo boqol o somali ah baa ku maqan ) dadbuu halyaay u yihiin oo aan laga taaban karin.
      ugu danbayntii somaliyay laablakaca iyo wax aanad qabiilkaada kula yaabin intaan iska dhaafno xal aan raadino,
      FG ma qabo xasan waa danbi la'aan mana qabo xataa waa danbiile lakiin qabiilada kale danbiilayaashiida hadaan la amxkamaydn xassanna ha la dhaafo ee xal doon aan noqon yaan leeyahay. anigu isku beel baan nahay xasan dadka aan aadka u tageero yuu ka mad ahaa lakin waxa uu hadda ila yahay dagaalkii dowladi shariif kadib in xasan dahir uu mudanyahay in wax bdan dhiiggii daatay wax laga waydiiyo. aniga oo ay ila tahay in dad badan oo maanta jecel in maxkamad la saaro xasan ay kuwa isaga ka xun ay u doodayaan hadana hadii xal, nabad ama dowladnimo lagu helaayo illaa waa in cid lagu bilaabaa wax aan jecelahay in isaga laga bilaabo lakiin haddii aan meelna loo socan oo kuwa qaar madaxdooda iska ahaan doonan dad kalena sii dili doonan waxba yaynaan ka talinin in aan dab abuurno.

      Delete
  5. Mohamed Kismaayo17 July 2013 at 16:39

    asc mudane yuusuf adiga waxaad tahay wariyaasha isku badalay siyaasin hadana hadii laguu sheego dhaliishada ama turxaan bixin caro ayad ka muujin marka ogow waxaa macquul ah in aan aniga qoraalkayga ku qaldami karo adna aad qalad gali karto qaladkaas waxaa ka sixi karo qof kula mid ah iyadoo aysan jirin wax xad gudub iyo aflagaado ah rayiga xasan daahir maalmiihii macanka uu u arkay waa soo dhaafay maalmahaa qaraarkana ha u adkeesto waxii dhic karto in hadalkayga xanaf aad u yara aragto raalin galin baa ka bixin hadii aad ay saas tahy

    ReplyDelete
  6. SSC SOMALIA17 July 2013 at 17:17

    Soomaalidu haddii ay wax isu qiri lahayd beri hore ayay dhibkan ka bixi lahaayeen. Adeer Xassan qaladaad wuu leeyahay. Laakiin qaladaadkiisa waxaa fiican in maskax furan lagu fiiriyo. Qaladkiisa ugu wayn waa ku biiristii Shabaabka (Ama Xoog ama xeelad.)

    Soomaalida badideedu waa ogayd in uusan la afkaar ahayn raggaas. Laakiin waxay u badan tahay in awoodi meesha dhigtay oo laba daran mid dooro ayay u noqotay.

    Tan dagaaladda Soomaaliya uu kaga qayb qaatay dee ama qabiil baa loo dagaalamay ama hadaf kale oo ka macno wayn. Haduu hadaf ka sareeya kii Soomaali isku laysay u dagaalamay amaan buu ku mudan yahay.

    Magaciisa oo lagu daray liiska reer galbeedkana kama iman Soomaali ee Ethiopiya iyo shaqaalaheeda ayaa reer galbeedka gaarsiiyay. Xassan Soomaali oo dhulkeeda u tashata, kana tashata diintana ku dhaqanta ayaa hadafkiisa guud ahaa. Intaa wax lagu diido anigu ma arko!

    ReplyDelete
  7. Unknown17 July 2013 at 17:21

    Mohamed abdikariim waxa uu yuusuf ka hadlay waa xaqiiq jirta waana run oo taariikhda sheqa lama soo koobi karo. Laakin waxay ila tahay inaad adiga si gaar ah ugu faraxsantahay in dhib loo geysto odaga 70jirka ah oo waliba waligiisa wadaniga ahaa. Waxaa haboon in mar walbo la fiiriyaa maslaxada dalka ee lama fiiriya oo kalia dantaada gaar ahaaneed.waxaa mararka qaar ku qasbantahay inaad iska cafiso qof ku dhibaateeyay. 20 sano kabadan ayaan qaxooti nahay xasan dahirna sabab uma aheyn ee waxaa sabab u ahaa qabiil. Xasan dagaal oogayaasha maanta shaarka dowlada wato kama danbi badna.maanta ineey ayaga soo istaajiyaan maxkamadna waad fahmi kartaa cadaalad darrada ay keeni karto. Dil iyo xasiuqba wadanka waa loo geystay ama halagu dilo ummafa qabiil dartii ama mabda'a diin darteed. Danbiile waa uuna danbiile.

    ReplyDelete
  8. Unknown17 July 2013 at 17:32

    Waxey u muuqata Talladii lagu siinayay markii aad balan qaaday in aad soo gudbin doonto Xasan Daahir Taariikhdiisa aad hareer martay. Aniga waa ii dhimantahay inta aan ogahay qof dhahaysa Xasan Daahir waa la xoogaye Alshabab kama mid noqon, Arintaas waa Arin ceeb ku ah Shacabka Soomaaliyeed, mida kale Xasan Daahir marna kuma xusin meesha dadkii uu laayay marka laga reebo meelo yar oo aad dulmartay sida dagaaladii uu galay, taasina waa wixii aan ka digayay oo ahaa in aysan warbixintu noqonin mid isku qasan,

    Arinta kale ee fajicisada Noqotay ayaa ah in lala meel dhigayo Xasan Daahir Aweys dad wanaagsan Sida Sheikh Sharif oo ahaa madaxweynihii hore, iyo kuwo kale oo badan oo aan Shabaab noqon iyo nin noqday shabab dhiig u daadiyay shabab dartood, qaab qabiil dad u laayay, wallahi waxaa muuqata in aad adigu isku dayayso in xaqiiqda aad daah saarto lkn waan joogay waan ognahay wixii dhacay haddii la doono in si aysan ahayn looga sheekeeyana waan sheegi karna xaqiiqda.

    War hooy ka daaya sidaan arintu maaha ninkan dad ayaa god ugu jira sababtiisa, waa iga talo, qof walbana wuxuu shacabka u galay iyo wixii uu ka haleeyayba waa loo jeeda.

    ReplyDelete
  9. Unknown17 July 2013 at 17:53

    Malaga yabaa in Hassan hadii tolkis cafisey, in dadkale aay sugayan max kama diisa. Madaxweyne Hassan Sh baa wareeysigii Universel ka sheegay hadii Shiekho shacabka cafis weydiisto aay dowladdu cafis u fadineyso.

    ReplyDelete
  10. SAID HIRSI17 July 2013 at 18:30

    Yusufow, Xassan Daahir waxaa soo martay laba fursadood, oo midkood waxey aheyd waagii Casmara ee wadahadaladu u socdeen iyga iyo Dawladdii Marxuum C/alhi Yusuf inuu heshiiskaas wax ka qaato sidii Shariif Sh. Axmed-ba uu qaatay.

    Mayeelinee wuxuu maray dhinac qaldan wuxuuna ku adkeystay xagjirnimadiisii, isagoo ka soo degay Muqdisha kuna dhawaaqay inuu la dagaalami doono Dowladdii xiligaa jidhay,fursadaasi Xassan Daahir halkaa ayuu ku lunshay.

    Fursadii labaad ee uu helay Xassan Dahir waxey aheyd markii Al-shabaab iyo isaga ay iska hor yimaadeen oo ciidankiisii Beledweyn joogay xoog hubka looga dhigay isagoo aan Al-shabaab gacanta ugu jirin wakhtigaa ayey timi inuu kala doorto, 1-inuu nimankaa (Al-shabaab)ee sidaa u galay Somalina cadow u ah inuu raaco, 2- Iyo inuu raaco nimey saaxiibo ahaayeen hadana M/weyne noqday xushmad badana u hayey xiligaa waa Shariif Sh. Axmad-de uu la qaato dawlad-nimada. Xassan Daahir wuxuu qaatay Option-ka koowaada wuxuuna sidaa ku raacay Al-Shabaab.

    Yusuf Xassan Daahir ilaa waagaa gacmaha iyo lugaha ugama xirneyn Al-shabaab ee isagoo xora ayuu hadba maalin ka hadli jiray masjidka uu doono magaalada Muqdisha isagoo Al-shabaab sarkaal kamida ilaa Muqdisha laga saaray kamana uusan harin ee hadba godka ay galaan buu la galay. Arinta ah Xassan Daahir ma ka mid ahaa dadka dhaliinyarada tashkiiliya ee u sheega inay is qarxiyan, dabcan waa uu ka mid ahaa baan qabaa oo Xassan Daahir weligii intii uu Masaajida ka hadlayey qaraxa halaga daayo dadka dhalinyarada yaan la marin habaabin lagama maqlin. Somalidu waxey ku maah maahdaa "meyd kee u danbeeyey, saa la yiri kan la sii wado" Xassan Daahir qaraxyadii ugu danbeeyey ee ardeydii Tutkiga aadeysay lagu laayey xataa kama aanu hadal, ogowse weli xor buu ahaa oo waxaa ka danbeysay oo uu ka hadlay dilkii loo geystay Sh. Cabdulqadir Gacamey oo uu Xassan sheegay inuusan qeyb ka aheyn.

    Sikastaba ha ahaatee wixii dad lagu laayey qaraxyo arxan darro ahaa ee aan loo meel dayin loona aaba yeelin ee xanuunka badnaa waxaa abaabulkeeda qeyb mug weyn ku lahaa Xassan Dahir. Xassan Dahir waxaa weli ka qoyan dhiiggii umadda Soomaaliyeed ee wada muslimka ah, mana ahan nin horay ugu sheegay dadka Soomaaliyed iyo dowladoodadaba inta aanu gacanta u soo gelin inuu ka baxay Al-shabaab, haddaba ninkaasi ma Hero buu kuu yhay Yuusufow mise danbiile?.

    ReplyDelete
  11. Unknown17 July 2013 at 18:45

    Hhhhhhh Yusuf taariikhda in la marin habaabiyaa waaa waxa Soomaali dib u dhigay sida in qof xun oo umada halaagay halyaay lagu tilmaamaa kan wanaagsanna taariikhdiisa la duugaa.
    Sh.Xasan waa danbiile danbigana qofna qalad ka dhacaa ayaa ka keena qofna waxbay u danleedahay marka ay gelayso sida in ay dhaqaale ku raadisaa ama madaxtinimo,marka Xasan Daahir aways waa kursi doon dooni la caarisay waxayna ka gashay in uu shacabka xasuuqaa. Aniga su'aasha aan qabaane waxa ay tahay haddii ciddii dinbi gashaa beelu soo garab istaagtaa goormee lagu tegaa in dadka caddaalad loo sameeyaaa, mase dhamaanaa nin hogaamiye kooxeed ah oo dadka laaayaa hadiiba aan cadaalad la horkeeni karin ?
    Maalin kastaaba dadka hala cafiyo haddii la dhahaa cid kastaa in ay dadka dishaa ay ku dhiiraneee.

    ReplyDelete
  12. Yusuf Garaad17 July 2013 at 19:04

    Xasan Daahir waxaan ka qoray inta aan ka maqlay taariikhdiisa. Qofkii haya wax aan ka tegey oo muhiim ah, ama haya wax aan meesha ku qoray oo aan sax ahayn, fadlan wey u furan tahay in uu soo qoro.

    Dadka jecel in Xasan la eedeeyo anigu dartood uma eedeynayo. Laakiin maba ogi meesha ay ammaan ku noqotay nin aan ku sheegay in dagaal kasta oo magac diineed lagu qaaday oo dalka ka dhacay in uu ka qeyb galay. Mahadsanidin.

    ReplyDelete
    Replies
    1. Khadar18 July 2013 at 08:49

      Well said Yusuf Garad waana ku mahadsantahay sida macaan ee qoraalkaaga aad inoogu soo gudbisay

      Delete
    2. Unknown19 July 2013 at 07:26

      This comment has been removed by the author.

      Delete
    3. Unknown19 July 2013 at 08:59

      Yuusuf beenta iyo qabyaalada allaha kaa cafiyo. Xasan anigoon wariya aheyn baa intaa ka badan ka aqaano. Xasan waa ninkii yiri anaga muli muli ayaan nahay bayina kama maaranno shabka muqdishona waa inoo biyo. Aniga waxaan qabaa xasan in loo qasaaso dadkuu laayay.waligey talaaba uu qaaday ee lamahdiyo ma arag.

      Delete
  13. Hashim Sheikh Abdinoor17 July 2013 at 19:08

    Aad ayaa ugu mahadsantahay Yusuf sida quruxda badan ee aad usoo diyaarisay taariikhda Xasan Dahir Aweys, balse waxaa moodaa in aad wax yaabo badan aad katagtay.
    Hadii aan dhanka dowlada aan aado, dowladu waxa ay codsatay waqti, taasi maaha in ay kafikireyso sida laga yeelaayo Xasan Dahir balse waxaa weeye sida cadaaladu kudhisantahay dastuurkana waafaqsan.

    ReplyDelete
  14. Unknown17 July 2013 at 19:46

    Sifiicanbaad udhig dhigatay inkastoo aad soo koobtay laakiin dhinaca fikirkan ah dhalinyarada la marinhabaabiyay inuu kaqsybqaatay shaki kumajiro oo waraysiyadiisa ayaa cadayn u ah dhinaca kale dadkii kudhamaaday weerarada isqarxiska ah wuxuu kutilmaamay inayba shahiideen sida uu kucadeeyay waraysi uu siiyay Somalichanell wariye xasan cade waxyaabahaas ookale markaad fiiriso waxaa kuusoobaxaya inuu uguyaraan taageersanaa fikirkaas haduunan kaqaybqaadan xitaa.
    Hadaan usoo laabto dawlada ma arko ragii maanta badbaadinlahaa ama liiska argagixisada intay dad soomaaliya kasaaraan kuba qancinkara inay iyagu laxisaabtamayaan dadkooda wadmada kalee argagixisada baacsada, hadaan soogaabiyo soomaaliya nin geesiya ayay ubaahantahay maanta oo caqabadan kasaara una joojinayn reer hebel iyo oday hebel sharcigu waa inuu kasareeyo cidkasta xitaa odayga ansixiyay ama madaxda diyaarisay haday jabiyaan waa inuu talaabo kaqaadikaro jileecbadan baa muuqda dhinaca dawlada hadayna jilicsanayn muqdisho kaliya ayay amaabkeeda sugilahaayeen majirto sabab lagumarmarsoodaa oo amaabka muqdisho loosugi waayaa sidaan u arko ma aha dadka waa in hubka laga ururiyaa oo uusan jirin qoriga dawlada ma ahee midkale waxa sooraacaa waa mid cadawgu wato cidii hubka dhistaa kasoohorheedsatana dawladu xaqbay uleedahay inay talaabo kasta ooy umarayso adeegsato ilaa, arimahaa ragii qabanlahaa maanta inay maamuka hayaan uma arko soomalia maanta halkay taagantahayna nin jilicsan iyo mid eedka cararaya toona ma ahan miday waxkaqabankaraan.

    ReplyDelete
  15. Anonymous17 July 2013 at 19:54

    Yuusuf-Garaadow,

    Salaan qiime badan ka dib, markii aan cinwaanka arkay, arrin qalbigayga ku soo dhacday in aad wax ka oran doonto ayaad ka baaqsatay.

    Nayroobi waxaa la iigu sheegay nin Nuuraddiin Yuusuf Xaaji la yiraahdo oo ciddii wuxuusan jeclayn ku tiraabta "tuugo" bastoolado leh ka adeejiyee, haddii aad laptop-kaaga iyo i-Pad-kaaga iyo weliba lafahaaga u gaabsatayna waan ka garaabayaa. Waxaa la yiri: "dhallaan aan xil garan xig baa lagala haraa."

    Arrintu waxa weeye: Sheekh Axmed Islaam iyo Sheekh Xasan Aweys maxay ku kala duwan yihiin?

    Waa maxay sababta keentay in midna Red Carpet lala sugayo, oo ay xubnaha ugu galaangal badan dawladda Soomaaliya aragtidiisa u safrayaan, midna uu xabsiga ku silcayo?

    Waa labo xagjir. Midkoodna weli ma oran "Waan ka baxay Argaggixisadii." Midkoodna uma cudur-daaran dadkii uu halaagay iyo eheladoodii. Labaduba dawladda Soomaaliya way ka soo horjeedaan, Axmed baana haatan shiddo iyo lug-gooyo badan. Labaduba dembiyo qaran iyo kuwa caalami ah bay ku eedaysan yihiin. Axmed Madoobe wuxuu intaa dheer yahay dembiyadiisa dagaal saacaddan aan wax qorayo waa ay socdaan.

    Labada sheekhba Axmed Godane ayuunbay kala boodeen. Sheekh Xasan Aweys iyo Godane waxay isku qabteen arrin aaminsanaan iyo aqoon diimeed ku tacalluqda. Sheekh Axmed Islaan iyo Godanena waxay isku qabteen saamiga laga heli jirey dekedda Kismaayo.

    Haddii ay Axmed Madoobe Sirdoonka Kenya isku fiican yihiin, innagu ma Sirdoonka shisheeyaannu madaxnimo u doorannay? Aaway xaqii aannu ku lahayn madaxdeenna? Xaggeese lagu arkay dad dawlad sheeganaya oo la-jiifiyaana bannaan intan le'eg isticmaalaya?

    Labada nin ama ha la wada xiro, haddii kale labadaba masuuliyad ha loo dhiibo.

    ReplyDelete
  16. Unknown17 July 2013 at 19:55

    Nin yahow taariikhdiisa been baad ka sheegtay wada xun ayaaa lagu qabtay maalintow asmara kasow laabtay oo saldhig ciidan ka dhigtay SCHOOL 15 MAY Beeshiisa iyo culimada ugu tageen la baryay in nabada maalintaas shabaab awood malaheyn wuuna diiday waxuuna cadeystay in jihaad beenaadka uu ka harsan yahay 40 mitir oo madaxtooya u jirta hadii la qabsada dhamaaneyso dagaalka aaway dd kii ow u barakiciyay ceelasha biyaha iyo maah maah caan ah laga baxshay ceelasha biyaha oo ah ma qaxi C/LAAHI YUUSUF maad tahay mise kii XASAN DAAHIR sow laabadka uu sow laabtay waxey uyeeshay alshabaab cudud milatari magaalada mogadisho asaa xabada ka bilaaway dulmi badan wuu geystay hadii la cafiyo ama la musaafuriyo waxey u muuqataaa cadaalad daro markaas AXMED GODANE na waxuu istaahilaaa in roog gaduudan low dhigo arinta is qarxinta asigaa amaanay misna bogaadiyay xiligii la qarxinaayay CUMAR XAANSHI AADAN IYO ODAYAASHI gaaraayay ku dhawaad 100 marka taariikhda beenta ahbiska daaa

    ReplyDelete
  17. Maxamed Muxumed Cumar17 July 2013 at 19:57

    Garaad, mar kale Ramadaan Kariim.

    Farriin aad u dirtay RW Saacid, ayuu nin kugu weeraray inaad tahay xildoon. Inaad xaq u leedahay xil inaad qabadtid markaad u sheegtayna wuu isku yaxyaxay, kuuna garaabay.

    Qoraalkaagii heshiiska hawada ee Soomaaliya & Somaliland anaa kugu tuhmay, inaad ku boorrinayso in Hargaysa & Muqdisho ay gobollada kale hawada ka cunaqabateeyaan. Wxd iigu jawaabtay, inaad ka digaysid inay arrin militari iyo siyaad lagu xallin waayay ay sidaas isku dayaan. Anna cafis baan kaa dalbaday, waanan kuu mahadnaqay.

    Aan u soo noqdo mowduucadan. Waa Sh. X. D. Aweys. Aniga iyo Sheekhu ma wadaagno mabda'(saar-diimeed) oo wadaad xagjir ah ma ihi. Mana wadaagno qabiil oo waxaan ahay Absame, Daarood. Isna waa H.Gidir, Hawiye. Laakiin waxaan la wadaagaa diin, dal, calan iyo dad - QARAN.

    Macne badan iigu ma fadhido shakhsiyan in la daldalo, in la masaafuriyo ama in la cafiyo. Taariikhdiisa waan ka dharagsanahay khalad iyo sax wuxuu gudo iyo wuxuu galo intaba. Waxaan dhashay dagaal kii -77 kadib, taariikhdiisana ma xiisaynayo.

    Cimrigayga saddexdiis labaan qurbe(Yurub) ku noolahay. Waa 22 sano. Waxaan xiisaynayaa mustaqbalkiisa. Xassan Daahir arrinkiisu wuu ka weyn yahay arrin Habargir. Wuxuu saamayn doonaa qabiil walba iyo ugu yaraan Geeska Afrika oo idil.

    RW hii hore ee Israa'iil,Jitzhak Rabin, ayaa nabad la saxeeday Yaasi Carrafaat oo qornaa argagixiso. Mar la waydiiyay, inuu galay khayaano qaran, maadaama uu la heshiiyay cadowgii soo jireenka ahaa ayuu yidhi: "heshiis sidiisaba lalama galo gacal ama sxb, ee waxaa lala galaa cadow!". Wuuna u dhintay heeshiiskaas geesinimada lahaa, 1995.

    Xigmadda wax ku oolka ah waa in laga qaadto muslim, yuhiidi, kristan iyo cid walba. Xassan Daahir hadduu jeel ku dhinto ama la daldalo waxbo noo soo kordhin meyso. Haddii la cafiyo se, waxay dhiirri galin kartaa - oo isha ku haya xaalkiisa- inay nabad qaadtaan, kumanyaal dhallin ah oo naftooda halligi lahaa. Kumanyaal kalena galaafan lahaa. Burburka dhaqaale ee ka dhasha ama iyaga lagula dagaallami lahaana waxaa lagu dhisi kara mashaariic horumarineed, caafimaad, waxbarasho, jidad iwm.

    Sh. Shariif iyo Sh. Amxed-Madoobe waxay ahaayeen islaamiyiin xagjir ah. Maantana waa madaxweynayaal aynu u sacbinno. Kaarkooday si kale u ciyaareen. Hadduu Sh. Xassan ilduufay ama la qasbay kuu doonaba waa 80 jir cimrigiisii gabagabo yahay. Sida loo maareeyo xaalkiisuna wuxuu saameyn weyn ku yeelan doono nabadda iyo xasilloonida Geeska. Si xun ama si wanaagsan. Dookha isagu maanta ma laha.

    Madxweyne Xassan Sheekh waxaan leeyahay, kiiskii Jubbaland ayaad si xun u maamushay, kuna fashilantay qabiilladiina ku kala fogaysaye arrinta Sheekh Xassan ha dhayalsan, yaysanna kaa hoos bixin. Waa hadday adiga kaa go'do. Haddii kale dagdag gacmaha u taag!!!

    Garaad, adigana waxaan ku leeyahay dad badan ayaa afka kuu galin doona wax aadan qorin ama u kas u qalloocin doona. In kastuu qofina uusan qabiilkiisa inkiri karin, haddana markaad fikirkaaga xaq amaba xal u aragto, ha la gabbannin, uurnugaylkana waagii BBC:da kuguma aqoone seefta galka ka saar. Waxaa kaa muuqadta taxaddar zaa'id ah.

    Qofkii si edeb leh wax kuu weydiiya ama uu mugdi ka galo warkaagana ha is ka kibrinnin inaad qanciso ama saxdid. Blogguna wuxuu ka xiise badan yahay markaad nala wadaagtid doodda iyo kaftankaba. Sidii aad yeeli jirtay banaamijkii Falanqaynta Jimcaha.

    Mahadsanid sxb. Wa Billaahi Towfiiq.

    ReplyDelete
  18. Unknown17 July 2013 at 23:11

    Arintu Xasan eedeey maaha ee cadaalad u samee qoraalkaada waaye oo sheeg xaqiiqda, marka aan sidaa dhahayana yeysan dadku u qaadan yusuf wuxuu ku beel yahay Xasan Daahir oo sidaas ayaa loo eedeynaya, waxaan kusoo qoray haddii aad la socotay markii aad balan qaadeysay Tariikhda Xasan in aysan Noqon tainted one, ma garan karo waxa qasbaya in naloo sheego wax aan xaqiiq ahayn maanta oo dhan kadibna lagu soo afmeero in dowladu dhumisay fursad, haddana talo lagu bixiyo in la musaafiriyo shaqsi Soomaali ah, xagee laga keenay Musaafirin ma jirtaa muwaadin wadankiisa lagu tuhmayo in uu danbi galay oo ciqaab looga dhigayo musaafurin, weydii qareenkii aad doonto Musaafirin xal ma noqon karata? waxaan u baaqaya dadka leh intimate knowledge of law in ay arintaan ka hadlaan. yes waan raacsanahay arinta aad sheegtay ee ah in maxkamad lasoo taago.

    Hadaba maxaa xal noqon kara?
    xalka kaliya ee muuqda isla markaana noqon kara wax isbedel weyn ku sameeya xaalada soomaaliya waa in lasoo taaga maxkamad isla markaana inta uu galabsaday xadkeeda in la eg laga oofiya marka aan sidaa leeyahay yaa loo qaadan in aan arintaan ku colaadinayo dad ama reero ee waa xalka kaliya ee ay ku qanci karaan dad badan oo soomaali ah from Bosaaso illa Gedo oo sheeganaya in caruurtoodi iyo dadkii ay jeclaayeen u si toos ah u laayay ama si dadban taas oo ah in caruurtooda uu u qortay dagaal ay ku dhamaadeen, Anigu ma jecli in aan caadifad wax u cabiro waxa aan ka hadlayana waxaan qoray aniga oo ku kalsoon in aan muujiyo cadliga mar kale iyo mar kale Yuusuf waa a decent author waan jeclahay qormooyinka uu sameeyo ra'yigiisa wuu u madax banaanyahay iyo sida uu wax u arko, lkn mar walba Truth never decays.

    ReplyDelete
  19. Unknown17 July 2013 at 23:16

    yuusuf garaad waan umahad celinayaa walalkeen talada uu kabixiyay arinta xasan daahir.
    lkn waxa ay ila tahay in xasan daahir uusan galin dambi loo maxkamadeeyo,ama loo dhibaateeyo,waxa uumudanyahay in loo mahad celiyo laguna sharfo halgankii dheera uu usoo galay wadanka.
    xasan daahir ma uusan galin danbi uusan galin shiiq shariif oo loo ogolaaday inuu madaxwayne kanoqdo dalka.
    xasan daahir laguma eedeykaro waxa uu ladagaalamay dowlada shisheeye.hadaan lagu edeyn sh.shariif,iyo ragga hadda ka ah saraakiisa dowlada soomaliya.
    xasan daahir mahan alshabab waa lawada ogyahay waxa ay samaynayaana kuma laha wax talo ah iyaguna uma ogola.marka sidaas darteed waxa uu umadan yahay in laiska sii daayo oo xoriyadiisa loo soo celiyo.

    ReplyDelete
  20. Somali Canadian Diaspora News...18 July 2013 at 07:45

    SXB Macmacaaniska iyo subag noo marinta ninkan qabiilka ku hoosqarsoonayahay nagadaa kamanahelin,Opinion---- Daahir Aways danbi ayuu dadka iyo Dalkaba ka galay, Haduu aabihii ahaa Macalin asaga waxuu noqday ardaal, miino dadkii kuwada xiray, Dhiigana cabay, isqarxiskanam Xalaaleeyay. Waa in Maxakamad La sootaagaa,Laguna soo oogaa wax Alaale iyo waxii Alashabaab qarxiskooda, ama dagaaladooda ku dhinatay Dilkooda in uu lug ku lahaa kana danbeeyay--xataa hantidii ku bur burtay Qarxiska. maaha kaligiis laakiin waxii burburkan lug kulahaa oo dhan, xataa qaar wariye yaal ah oo dabka halkan ka huriya.

    ReplyDelete
  21. Unknown18 July 2013 at 09:50

    yusuf waad ku mahadsantahay exercise ka aad markaste noo dhiibto, aniga waxaa hubaa in hassan dulun lagu haysto maxaa yeelay sidii aad hore ugu sheegtay qoraalkii aad ka qortay odoyaashii la garaacay, dambiilayaal waaa buuxaan wadanka ayagoo ah xildhibaano, gancsato, madax iyo shacab.
    MARKA WAXAAN U FAHMAY IN LAGU RAALI GALINAAYO GAALO, taasuna waxay keenee in dowlada federaalka ay ku wayso 70% dad taageersanaa dowlada hadaysan hada war cad ka soo saarin oo ama cafis ah ama masaafurin ah wada kale oo furan ma jirto.
    Wada u furneed way jirtay madaxda dowlada waxay aheed hadaysan si buuxda u maamuli karin issue ga hasaan dahir inay markii horaba aysan been sheegin oo odoyaahsa iyo xildhiaanada keenay u sheegaan in lala maamuli doono.

    NB. Maxay tahay halka cilo oo hassan daahir leeyahay?
    (waa madax adeeg) maxaa yeelay waxaan maqleynaa ilaa hada waxow ka tanasuli la,yahay ama dheh lagu la,yahay al-shabab ma ihi haday run tahay.
    RAMADAAN KAREEM.

    ReplyDelete
  22. faderaalka18 July 2013 at 14:47

    ASc Mr yusuf garaad,sidoo kale ramadaan kariim,waxa aan qabaa in aad ka hadashay laba qodob oo kala ah dowlada maxey ficil dhaqso ah uga gaari la dahay shiiq Hassan dahir,iyo fikirka laga aamin sanyahay shiiqa.
    tan koowaad waxaan qabaa in yuusuf aad ku degdegtay dhaleecada aad u soo jeedisay dowlada,aana ogahay in weerarkaagu ku socdo madaxweynaha iyo reysal wasaaraha,balse aadan ka fiirsan cida shaqada ku leh shiiqu haddii uu dambiile yahay iyo in kale,taasna waxa ay u taalaa hayada garsoorka,awoodaha kale ee dowladuna wax shaqo kuma laha,waxaadna ogtahay in xuukamada Obama ay wax ka qaban ladahay dadka loo heysto dambiyada alshaab oo kale ee ki xiran GUANTAMA ee aan ilaa hadda wax maxkamad ah aan la soo taagin,ee walaaloow jooji qarandumisnimada aad wadid,oo ah wax laguu soo dhiibtay,oo aad tahay oo kaliya AALAD
    Arinka Hassan waxaan ka qabaa in uu ka soo jeedo qoys wanaagsan oo ahaludiin ah,ha noqoro aabihiis,walaaladiis,marlabaad ka waantoow baansiinka aad dabka ku shubeyso,waxa ku guban doonaa waa dadkaaga iyo dalkaaga,waxaan rajeynayaa in taladaan wax kuu noqoto

    ReplyDelete
    Replies
    1. Yusuf Garaad18 July 2013 at 21:20

      Saaxiib magacaa? Ra'yi wanaagsan ayaan dhibayaa oo wax baan saxayaa, laakiin magacayga waan la dhuumanayaa! Maxay taasi uga duwan tahay, Kuwa leh shareeco ayaan dabbakhayaa afkana waan duubanayaa? Xataa Kama xishooneysid in aad isku daydo in aad ka been sheegto qormadeyda isla boggaan ku daabacan.

      Delete
    2. faderaalka19 July 2013 at 13:16

      waad kumahadsantahay in aad aqoonsato rayigeyga in uu wanaagsan yahay,balse magaceyga waxaad ka arki kartaa profilkeyga,oo waxaa kugu filan oo kaliye clik federaalka,
      qoraalkaaga been kama sheegin,haddii ay hadda kula xumaatayna,waa wax lagu garto qofka caqligiisu sareeyo,,marka hambalyo.

      Delete
  23. Maxamed Muxumed Cumar18 July 2013 at 22:50

    Garaad, arrinka Sh. Xassan Daahir ra'yi kama dhiiban kartid. Waxaad isla tihiin Hawiye, waliba H.Gidir, waliba...
    Waxaad noqonaysaa qabyaaladiiste.

    Madaxda hadd talisa, sida Madaxweynaha iyo RW ha midna lama talin kartid. Waxaad noqonaysaa xildoon.

    Madaxdii hore lama affuri kartid, iskaba daa inaad isla sawirto. Waxaad noqonaysaa mucaarad.

    Maba hadli kartid sideedaba. Annagu ma naqaan xorriyatulqawl.

    Maahmaah waxaa jirta la adeegsan jiray dagaalkii qaboobaa: Ninkii jiho u sujuudaa(bari ama galbeed), jihuu dabada u duway!

    Xaalkaagu waa sidaase maxaad yeeli sxb?

    ReplyDelete
    Replies
    1. Unknown19 July 2013 at 05:35

      MM cumar. aad baan aragtidaada uga helay. sida aan u fahmay, malaha maadeeys baad uga danleedahay (hadaanay sidaa ahay, iga raali noqo)
      waxaad u malaysaa in fikrada ah "labada-cirif" oo kaliya in aan tixgelino marka aan ruux ama aragti xukumeyno. (Hebel waa mucaarad ama waa muxaafad, hebel waa wadani ama khaa'inul wadan. IWM) xaqiiqdu waxa ay tahay in ay jirto wax labadaa cirif u dhexeeya, waana tan loo baahanyahay in aanan halmaamin marka aan xaajo lafagureyno.
      waano saaxiibtinimo, adeegsiga magacyda qabiilada waxaa laga yaabaa in ay walaalaha kala fogeyso, wey fiicnaanalahay hadii aan iska dhaafikarno. mahadsanid

      Delete
  24. salman alaska18 July 2013 at 23:21

    yuusuf hadii aanka hadlo ra'yigayga dowladu waa qaldan tahay anoo u sababaynaayo qodobadaan 1.odayaasha oo heshiiskii looga baxay 2.odayaasha oo lajirdilay 3.sheekha ooy iska haystaan bilaa sharci ay mudneyd inay maxkamadeeyaan ama cafis ufidiyaan mana ahan bahasha in la'isku adkeeyo sh.xasan kaligiis wadanka iyo dadka qalad kama galin kuwo badan oo maanta kamid ah xukuumada ama kamid ahaa tii hore ayaa ka dambi badan 4.madaxwaynuhu wuxuu balan kaqaaday odayaasha kadib markii lajir dilay uu kudhahay arrinta xasan daahir asbuuc aa lagu xalinaa ilaa hadana waxba kamasoo naasa cadaan 5.dowlada oo kala hadalee madaxwaynaa kahadlaa, wasiiraa kahadlaa.......... gunaanud waxaan dhihi lahaa bilaa shuruud hala siidaayo sh.xasan

    ReplyDelete
  25. Unknown19 July 2013 at 09:16

    Yussuf Garaad waxaa tahay nin Qabiilka dhiiga kaaga jiro. Marka aad ka faaloonaysid Taariikhda adeerkaa Xasan Daahir, maaad ka hadashid taariiqda xun ee Xasan daahair aweys oo ururka argagaxisada ay ku haleegeen ardaydii ka qalan jibineysay jamaacada xamar iyo kuwii lagu baabiyay markii ay natiijada imtixaankaado fiirasanayeen, ilaah baa Soomali ka badbaadiyay in adigoo kale Saomli Madaxweyne u noqon . Xasan Daahir waaa Argagixiso wasaq ah aanan Islaamaka wax aqoon kuna danbeeyo qaraxii lagu halaagay Arday 18 jiro ah oo aanan wax galabsan, waa in maxkamad lasoo taagee lana dardalaa.

    ReplyDelete
  26. Unknown19 July 2013 at 12:44

    soomaalida dhibka haysta wuxuu yahay waa labo nooc. kuwo iyagaa qabiil madax maray wixii aan kahadlin danta ugu muuqata in ay tahay danta qabiilkiisa way aflagaadaynayaan. kuwan kale cidii kahortimaada ama sheega wixii ay layahy in ay kasoo horjeedaan danta qoyskooda way nijaasaynayaan. bal ufiirsada talooyinka iyo faalooyinka yuusuf garaad aragtidiisa laga qorey waa labo nooc. qayb waxa ay ku eedaynayaan in uu qaran dumis yahay oo uu kahoryimid dawladii qoladoodu hormuudka ka ahayd. qaybta kale waxa ay ku eedaynaayaan in uu qabyaaladayste xun yahay tan iyo intuu bbc da editorka ka ahaa. anagu labadaas qoloba waan ka argti duwanahay. waa tan koobaad qarandumisnimo ma aha in dawlada dhaliisheeda lasheego oo wixii ay khaldayso ladhaho halkan waad ku khaldantihiin ee kajooga. taas waa tan saaxafada xorta ah ee uu yuusuf khibradeeda leeyahay ay qabato. waana tuu hada qabaynayo.
    tan labaad kuwan ku eedaynayo in uu qabyaaladayste yahay waxaan qabaa iyaga ayaa qabyaaladayste yaal ah. sababtoo ah mid kasta oo kamid ah wuxuu rabaa in uu danta qabiilkiisa uu yuusuf u buunbuuniyo.oo uusan sheegin waxa ay khaldayaan.
    waxaan xusuustaa markii yuusuf uu lawareegayey editor nimada bbc da dardaarankii maxed clahi uu siinayay. wuxuu yidhi idaacadan soomaali bay u dhaxaysaa ee sidaas umada cadaalad ugu shaqee. waloow ay jirikaraan khalad kadhacay hadan yuusuf wax burush lagu mariyo muusan samayn in uu halkaas joogay.
    dhinaca kale xasan daahir waa odey soomaaliyeed in badan soo halgamay, una shaqeeyey umaddiisa. waloow uu khal damay markii uu utagay godane iyo alshabaab hadana waxaan qabaa in lacafiyo maanta. markaan sidan leeyahay ma ihi nin caydh ah, habargidir iyo hawiye midna. laakiin waxaan ahay soomaali runta sheegaya.
    mahad alaaleh. ramadaan kariim

    ReplyDelete
    Replies
    1. sameer21 July 2013 at 14:48

      adiga waxaa leedahay ha la cafiyo, ha u maleenin inta dheheeso yaa la cafinin inee abgaal tahay ummada somaliyeed inta damiirka leh oo dhan ayaa leedahay yaa la cafinin mida kale maxaa cadalada ku nacdeen waa la yaab qof walba waxaa la leeyahay dambi mu'uusan galin beri hadii la soo xero Godane adoo kale ayaa imaanaayo waa hubaal. inuu dambiila yahay wax badan kama sheegayi kelli waxaa tusaala kuu ah hada asagoo gacanta dowlada ku jira ayuu leeyahay kama tanaasulin dhiiga aan cabaaye taasi wexee ku tuseesaa inuu yasaayo dowlada iyo in waxaan aysan jirin iyo isku halees qabiil.

      Delete
  27. Unknown19 July 2013 at 14:07

    asan daahir waa nin kusoo dhiiradey inuu sahan unoqdo kumanaan shabaab ah waxayna eegayaan sida lava yeelo

    ReplyDelete
  28. Unknown19 July 2013 at 15:47

    The nation’s interest must come first NOT Shiikh Xasan Daahir or tribe. We have been this road for over 22 years, it is time for all of us to say NO to the Tribe driven ideas. Those who are obstacle to the peace regardless of their background or membership, they need to be dealt by force.

    I have respect for Shiikh Xasan Daahir and elders who brought in Mogadishu and I would like to see them leaving in Somali peaceful but if they refuse to part of the peace then government must deal with them by force.

    Axmed Gurey

    ReplyDelete
    Replies
    1. Unknown19 July 2013 at 19:36

      Wan ku salamaay sxb, marka aniga waxaan su'aal ka qabaa Sheikh Xasan da'diisa iyo dhimirkiisa xilligaan runtii waan jeclaan lahaa in aan ka mid noqdo dadka wareysta, Sh. Xasan ma leeyahaay garaad waqtigaan maxkamad lagu soo taagi kara ? Marka xiga ma wanagsan tahay in beshiisa xilligan ay u tafaxeydato sidii xabsiga looga sii deyn lahaa ?
      Markaa waxay iila muuqataa xilligaan Odayashaan xabadka garaacayaa ee leh ha la soo daayo maanta haddi iyaga aay Shabaab qaban leheyn Sheikh Xasan kama sii daayeen, markaa ma waxaa jira ujeedoyin kale oo ku qarsoon oo aan la shacineynin, mise odayaal baa raba in ay isbaaro u dhigtaan dowladdaan gacajiidka ah ee Mr. Garguurte hogaamiya, Aniga waxaan qabaa in aan la carqaladeyn dowladdaan odayaasha wan ogahaay waa lagu xad gudbaay mar haddii jirdil loo geystaay, balantii looga baxaay laakin wax walba waxaa ka waanaagsan in laga socodaa.
      Dawladda Mr. Garbuurtana ha soo dedejiso arinkaan maxaa yeelaay mowjada ayaa kaga furan webiga Jubba , ee kuwo kale yeeysan isku furin, Magaalada Muqdisho amankeeda ha la adkeeyo, Wasiirka Arimaha gudahana ha dejiyo arinta waa howl isaga u taalaa.

      Mahad sanid

      Fiiro gaar (haddi fikirkeyga uu dad ka u arkaan wax dhib ku ah waan ka raali gelinaa)

      Delete
  29. Unknown20 July 2013 at 08:09

    Shaki kuma jiro in uu Sheikh Xasan Daahir Aweys yahay gobanimodoon. waa geesi, waa caalim, waa waddani xalaal ah. Waa halgamaa u dirira sharafta iyo karaamada diinta Islaamka, ciidda iyo sharafta ummadda Soomaaliyeed oo dhan meel kasta oo ay joogto. Waa Sayid Maxamed Cabdulla Xasan-kii qarniga 21aad. Qof muslim ah oo Soomali sheegta kama istaahilo Sheekhu in sidaas foosha xun loola dhaqmo, loona garbaduubo cadawgii Soomaaliyeed iyo kan diinta Islaamka. Taariikh baa hadhi doonta, qof kastana waxay ku abaal marin doontaa wuxuu ka geystay(wanaag iyo xumo) dalkiisa, dadkiisa, iyo diintiisa. Caaddifad qabiil oo ina indho tirtay, jaha-wareer cadawga dadka iyo diinta Islaamku inagu riday, iyo waddaniyaddii Soomaaliyeed oo la inaga tirtiry darted baynu u garan la'nahay meeqaamka iyo hadafka Sheekh Xasan Daahir Aweys.

    'Allahayoow nin goba baan ahay oo guni rifaysaaye
    Allahayoow anaa kugu gar lehe guusha ha I seejin.....

    ayay maraysaa xaaladda Sheekhu Xasan Daahir Aweys.

    Soomali inteeda caqliga u saaxiibka ahi cod midaysan ha ku tiraahdo: degdeg ha looga siidaayo
    Sheekh Xasan Daahir Aweys xabsiga gumeysiga ( runtii ma ah xabsiga uu ku jiraa mid soomaaliyeed balse waa
    hogagga CIA-du ku leedahay Xamar.

    ---Darwiish---


    ReplyDelete
  30. DahaboDowlo20 July 2013 at 12:01

    Yusuf Garaad inuu caqligaas leeyahay ma moodi jirn runtii. Waxaan ku aqaanay in bahdiisa ka carara, cuuryaamiya, madaxa uga istaaga kooda aqoonta leh, waxgaradka ah ama uu arko inuu ka magac dheeryahau. Waa la ogaa xaaadiisa xiligii uu bbc Somali joogay. Waxaan ku aqaanay nin Damaaci ah oo isaga keliya inuu wax noqdo jeclaa, magaciisa keliya in la maqlo jeclaa oo aan qof kale idaacadaha laga maqlin. Wuxuu jeclaa inuu sameysto saaxiibo isaga oo u gaar ah uu sameysto oo uu uga faa'iideysto danahiisa gaarka ah, kuwa kalema madaxa uga istaago, si uu shiikhiyo magaca ay ku leeyihiin bulshada. Hore ayaa Soomaalidu ugu maahmaahday "Allow ninkii abaartii nagu yiqiinay aaraanka wax ha ka reebin"

    Waxaa kale oo naxdin aheyd shirkii Nairobi ee uu ka qeyb galay ee arrinta Kismaayo iyo faragelinta Kenyattiga, taas oo dad badan u arkeen inuu u xaqiray xaquuda shacabka kismayo ee la xasuuqay si uu kursi uga helo kuwa la shiray haddii ay mustaqbalka guuleystaan, uuna weji uga sameysto kuwa necbaa xiligii uu bbcda ka ahaa agaasimaha.

    i kastba ha ahaatee Qoraalka sheekha uu ka qoray ayaa wax ka bedelaya fikirkii hore ee aan ka heystay Yusuf Garaad allaha soo hanuuniyo. Waxaan uga hanbalyeynaya inuu qoraalkaasi ah mid diplomaciyadeed oo weliba si weyn oo wacan u qornaa, runna ku fadhiyey.

    Shaki kuma jiro im Sheikh Xassan Dahir aweys hadda laga gardaran yahay, waayo ma aha nin dagaal lagu soo qabtay, ma aha nin weqiga la qabtay alshabaab ka tirsanaa. Somalida ayaa tiraahda "afkaaga kala qaad aan ilkahaaga tirsho wax fiican maaha"

    Ilaa xiligii Ali Yusuf keenadiis ayaa shacabka Soomaaliyeed dgaal ku socday ama mid qaniil ha ahaado ama mid diimeed ha ahaado, mana jirto cid maxkamad loo soo taagay. sida Yusuf sheegay qaar ayaa ilaa hadda maamulo goboleed sheegta in ay madaxweyne ka yihiin,qaar ayaa madaxsare iyo xildhibaano soo noqdo. Haddaba waxa sheikha keliya loo naahdilay, waa arrim lagu xumeynayo beel gaar ah oo la doomayo in ay kacdo. madaxweynaha ha ogaado kuwa la taliyaasha isaga dhigaya ee Beenta ku afuufaya in ay aarsi doon yihiin, oo aysan daacad u aheyn ee ay doonayaan in ay cadow iyo maja xaabin u sameeyaan asaga, maadaama Kismaayo iyo meelo kale xaalad uga shidan tahay dowladiisa ay doonayaan in ay ku kiciyaan shacab kale ee hurdaya oo hadda aan mucaarad aheyn.Anigu ma oranyo sheikha maxkamad ha la soo taago iyada oo aan worlords yadii iyo kuwii maxaakiimta kula jiray ama islaamiyiinta la ahaa aam weli maxkamad la soo taagin, balse waxaan oranaya si shuruud la'aan ah ha lagu soo daayo, haddii kale Caanihii laga helo ayaa la arkayaa shacabka hurda oo la kicinayo oo kuwa la yaqaan oo aarsi doon ah ay magaca dowladda ku qaraabanayaa.

    Yusuf garaad waa qoraalkaagii u horeeyey ee macquulka ah ee aan arkay inta aad saxaafadda ku jirtay, ee halkaas ka sii wad oo qudhaadu cadaaladda ogow.

    ReplyDelete
  31. Unknown21 July 2013 at 00:54

    Siday ila tahey xassan Dahir sii xirnaashadiisa dowlada wax faaiido ah uguma jirto Laakin Odayga dadka laguma sii dayn karo asgoo wali aaminsan Fikirka Alshabab iyo in Umadda La iska Laayo.. hadii kale waa inuu saxaafada u cadeeyaa inuu kasoo laabtey Wuxu gacmaha kulajiray!

    ReplyDelete
  32. Anonymous21 July 2013 at 02:47

    Marka hore Soomaaliyeey Ramadaan Kariim, marka xigta Soomaalida Yuusuf Garaad ku eedeysa in uu yahay nin ay qabyaaladdu lafaha iyo dhiigga ka gashay waxan kula talin lahaa in ay raadiyaan oo ay soo baaraan waxa ay isu yihiin gabadha qoraalka kore ku saxiixan ee (Dahabo Dowlo)iyo Yuusuf Garaad Cumar. Waad Mahadsan tihiin

    ReplyDelete
  33. Unknown3 August 2013 at 22:39

    Xasan Dahir waa gacan ku dhiigle dad masaakiin ah ayuu laayay waa in cadaaalad lagu xukumo waxay ahaataba

    ReplyDelete
  34. Unknown5 August 2013 at 15:27

    WAxaan ila tahay aniga in odaygaas xaladiisa ay dib kasoo wanaagsanaanayso lakiin hadal waa kii hore ragna waa ragii hore o daygu odayaal badan ayuu kadambeeyaa caydiid waa xumaa hadana waa fiican yahay maxed siyaad waa xumaa hadana waaa fiican yahay asaga na markuu naga tago waxaan dhihi doonaa ala waxa uu ahaa geesi waayadi hore qofka aragtidiisa waxay aheyd mid qarsooni hada waa wadax taarikhleh yaan war adinka tagin waa iga digniin

    ReplyDelete
  35. Anonymous16 September 2014 at 13:34

    Magacaygu waa Adams Kevin, wakiil ka socda shirkada Adams bixinta amaah amaah laga amaahdo, waxaan siinayaa amaah ugu dulsaarka 2%. waxaan ku siin dhan nooc oo kala duwan oo amaah ah. haddii aad u baahan tahay amaah hadda nagala soo xiriir email this: adams.credi@gmail.com

    ReplyDelete

Subscribe to: Post Comments (Atom)