Total Pageviews

Thursday 12 June 2014

Hooyo la dilay!


Hooyo waa Biri-Ma-Geydo
Yusuf-Garaad
Waxaan maqlay arrin aad iiga cajibasay oo murugo leh. Gabar reer Marka ah oo London aan isku aragnay ayaa ii sheegtay in labada dhinac ee isku dilaya Shabeellada Hoose uu midkood dilay hooyo Soomaaliyeed. Ka dibna loogu aaray hooyo kale oo Soomaaliyeed. Allah ha u naxariisto labadaba.

Anigu ma aqaan dembi qof bani’aadam ah laga galo oo ka weyn in nafta laga gooyo. Taas oo hadda Shabeellada Hoose aad uga socota.

Waxaase iga sii yaabiyey ninka u bareeray in uu qof nafta ka gooyo asaga oo is illowsiinaya in Ilaahii qofkan uumay uu isagana la xisaabtami doono. Ee haddana waliba qofka uu nafta ka goynayo ka ay tahay haween weliba hooyo ah.

Nimanka dagaalka ku jiraa haddaysan ayagu is nabad gelineyn, waa in ay nabad geliyaan dadka aan dagaalka ku jirin siiba haweenka, carruurta, waayeelka iyo bukaanka.

Ma jiro sharci iyo qaanuun ay ku bannaan tahay in la dilo qof rayid ah. Hooyana waa lama taabtaan.

Beri aan baarayay xeerarka, dhaqanka iyo sugaanta dagaalka Soomaalida oo aan Waamo ilaa Djibouti socday, ayaan ka sameeyay 20 barnaamij.

Magaalada Hargeysa ayaan aqalkiisa ku booqday Xaaji Dallaayad oo ahaa nin-karmeed, sheekoole iyo gabyaa. Gabay aan ka soo duubay ayaa erayadiisa waxaa ka mid ahaa:

Dhirtaba Geed malko ah baa jiriyo lama garaacaane,
Dadkuna Biri-ma-geydo ayuu leeyihiyo lama guhaadshaane.

Oo uu inta wax fahmeysa ku tusaaleynayo in xataa geedaha ay ku jiraan kuwa aan la jarin sida geedka hooska weyn ee la harsado.

Dadkuna ay leeyihiin qaar aan bir lagula dhicin iyo xataa dhib kale oo ay tahay in la dhowro.

Sida ugu wanaagsan waa in Aadanaha oo dhami uu kaa nabad galo. Ogow dadka Ilaaheey ayaa uuntay, haddaad dad dil noqotana isaga ayaa kula xisaabtami doona.

6 comments:

  1. Fadlan taladaada halkan ku reeb. Mahadsanid

    ReplyDelete
    Replies
    1. Inta hufan hooyo ladilee gowrac la huwiyay
      Hanad inta la dilee meydkiisa howdka la tuuray
      Wadaad hanuunsan inta qoriga hoos loo dhigay
      Hal midaan ogayn iyo caruur inta xabad lagu heeray
      Hadal diin iyo soomaalinimo waa la hareer maraye
      Midka nala hooyaa iyo mid qalaad halaageenna
      looma kala harin

      Delete
  2. Xumaanba xumaan ayay dhaleysaa ayadoo awalba in leys dagaalo ay ahayd wax aad u fool xun ayaa markii aan ka hari weynay dagaalkii sokeeye waxa ka dhashay in dumarka xataa la laayo. Waan ka xumahay arxan darada dadka qaarkiis ay ku kacayaan Allah ha u naxariisto

    ReplyDelete
  3. Somaliwayn hooyooyinka hala ilaaliyo halaga warqbo hooyo wanaageeda waa badan yahay xuquuqday nugu ledahay / abaalkeedii ma in ladilo oo waliba hooyo kale loogu aargudo . Muslin iyo gaalo Boos ma looga hayo .

    ReplyDelete
  4. This comment has been removed by the author.

    ReplyDelete
  5. Haa waa qiso xanuun badan, qof caqli leh wax ka suurtooba maaha in hooyo la dilo, haddana hooyo kale loogu aaro, waxaa falkaas sameeyey waa dad waalan ayeynu dhihi karnaa, sababtoo ah qof caqligiisu u dhanyahay waxaas kuma kaceen. Soomaalidu waalida waxay u taqaan inuu qofku dharka tuuro oo markaa qashinka gurto, balse waxaa jirta waaliyo badan oo dhakhaatiirtu la tacaalaan. Taas ayaana haysa dad badan oo soomaali ah, ayna kaliftey dhibta joogtada ahi.

    Murtida aad xustey waxay i xasuusiyey hees ay ku wada luuqeeyaan Khadra Daahir iyo Cigaal. Ma hubo abwaanka sameeyey. Waxay leedahay : Dhirtaba geed laa jariniyo waxaa jira lama garaacaan (saad sheegtey waa geedka la hadhsado) Geedihii oo dhan waa la dhameystey hadeer, waa xaaluf dhulkii.
    Marti goor xun socotaa gurigaaga oo madhan........
    dadkaba gobol aan laqadin iyo
    ogow gibil madaadsha ha
    loo gawracaa jira, ( Waa abtiga, hadii aysan waxkale hayn reerku, awrka reerku ku guuro ee caruurta la saaro(gibil-madaadshe) ayey u gawrici jireen abtiga, saa cidkaleba waad qadin kartaa balse dhaqanka Soomaalida abtiga lama qadiyo)

    Biri ma gaydaduna waa dhaqan suuban oo soomaalidu waligeed lahayd.

    ReplyDelete